大陸伙計特別叻？
本文作者為米梓橋，原文刊於Facebook專頁，標題為編輯所擬
香港電視網絡劇集《來生不做香港人》，截圖來自香港網絡大典
有個friend今年走咗上大陸做生意。上咗去大約半年之後，對國內嘅伙計「讚不絕口」，話香港嘅打工仔輸唔知幾多條街芸芸。
我同佢講，你上去混得耐啲之後，體會就會唔一樣㗎啦。伙計既嘢，日久先會見到人心，共過患難先會知道邊個係好夥伴的。風平浪靜天下太平嘅時候，你往往都會誤以為，演技最好嘅嗰位伙計，係你最值得信賴既同事。
*****
另一個有趣既地方係，唔知點解，好多香港嘅老細，好喜歡去比較香港打工仔/國內打工仔，邊個既能力高一啲，邊個叻啲，邊個態度好啲…諸如此類。
比較高低其實有點多餘，我只能認為，兩地價值觀差距極大，造就咗兩種唔同嘅員工出嚟。邊個叻啲，好大程度上唔關佢本人既事，而係你點去用佢。
你要揾個同你衝衝衝嘅伙計，上面肯定易揾過香港。今時今日，響國內要揾個有sense而又肯搏嘅人，唔算好難的。我個friend話，覺得呢啲大陸伙計好肯搏，態度一流，只要稍加調較，tune到同香港既sense接近一啲，佢地簡直就係天下無敵。
呢個我覺得係好多響大陸混得唔耐既人既誤解。上面所謂既「工作態度好好」、「好肯學好肯搏」，同伙計既「上進心」與及personal ego，基本上直接掛鉤的。當你對佢地仲有價值既時候，佢地會做足120分俾你，但當這個價值消退既時候，佢地亦會不留情面咁離開你，甚至extreme一點，背叛你。
香港老闆在大陸，往往都係後知後覺，以為嗰個好似好loyal又好肯學肯摶既好伙計，會一直保持咁既attitude幫你做嘢，但卻唔發覺，自己能夠俾到佢既價值，卻一日一日咁減退，直到有一日，被狠狠背叛。
香港既同事，即使係有料到既，亦未必會做足一百分。work life balance、照顧家庭…好多不同既理由，令佢地即使做到盡，都只係得八九十分。八九十分夠未？我覺得夠贏就ok了。但香港既叻人，通常有個特點，就係即使要走，要另謀高就，但總會重視要好來好去。你平日對佢唔太差的話，即使你有難既時候，佢地也總唔會話跳船就跳船。肯共患難既人，比例還是有不少的。
共患難既代價係，風平浪靜既日子，佢未必會交120分俾你。但係120分重要啲，還是患難時候既雪中送炭重要啲？
我落過難，我既答案肯定係後者。當你落難既時候，唔好話120分，平日肯交200分都係多鬼餘。落難既時候，最緊要，係仲有人肯幫你。
除非你老竇有幾百個億backup你，做生意，總會有落難既時候的。
支持EJ Tech
如欲投稿、報料，發布新聞稿或採訪通知，按這裏聯絡我們。
