同事盡了力 犯錯亦包容
已故著名工業家蔣震有6女1子，蔣麗婉是孻女，陪伴父親身邊日子最多，待人處事亦甚有乃父之風，「有樣嘢我好感激佢，呢個老闆真係一等一，佢唔會怪你犯錯，只要你用咗心，我同佢共事咁耐，一定有犯過錯，每次佢只會話『No problem, continue（無問題，繼續）』，因為佢咁嘅態度，先令我唔恐懼學習同做決定。」
如今到蔣麗婉成為集團掌舵人，也奉行這種管理風格，「當然都要睇吓你犯嘅錯有幾大（笑），若果係不可挽回嘅就另計，其實只要你事前經過深思熟慮，犯大錯嘅機會好細，所以當同事有晒周詳計劃，即使達唔到理想結果，我係會表揚，因為過程同結果一樣重要，你掌握到個過程，從中學習，個結果先會一路進步，呢個想法有啲似日本企業。」
「只求盡力」哲學也套用到教兒育女，「有時佢哋（子女）做得好，會話『媽咪睇我做得幾好』，我話好唔好係在於你有無努力過，如果你盡咗全力，個分數並非絕對性，但一定要問心無愧，人生最後悔同慚愧係你無盡到力；最緊要心態肯盡力嘗試，作為父母可以提供協助，譬如幫佢哋搵補習老師。」
蔣麗婉長女在美國取得哲學學士後，現於當地進修法律，是否代母親完成當年心願？「絕對唔係！佢讀完哲學，覺得仲未完成佢要尋找嘅嘢，就繼續讀。」幼子在美國哥倫比亞大學畢業後回港，現從事電腦科學；可期望他們將來接棒？「呢個太長遠，千祈咪搞住先，我要集中精力搞好公司，呢幾年我哋做咗好多管理架構改革，請咗超過20位高管，希望將企業思維模式提升到另一層次。」
揀人才一定要叻過自己
挑選人才方面，她強調會將性格納入評估，因團隊精神在改革時期至為重要，「我自己揸住個重點，就係『溝通』同『學習』，我向身邊同事講，你喺你個範疇一定要叻過我好多，唔止少少，否則我同你溝通無意思，你唔會帶我哋企業前進。」
「我哋有位管理同事帶咗句話入嚟：『挑戰是合理的質疑』，即係開會時，個個都應該對一啲新構思提出挑戰，唔好覺得自己外行就唔講，總之對事不對人，只要同事具備團隊意識，就唔會覺得俾人挑戰，挑戰唔係攻擊，係交流意見。經過一輪交流挑戰，出到嚟嘅嘢錯極有限，呢句嘢已經變成我哋所有人開會嘅座右銘。」蔣麗婉如是說。
更多「周一人物」文章：
支持EJ Tech
如欲投稿、報料，發布新聞稿或採訪通知，按這裏聯絡我們。
