我在 Startup 的日子－GoGoVan篇
原文刊於「MT GUY」Facebook專頁
MT GUY:
做MT，唔一定有明確嘅 Career path, 唔一定有既定嘅 rotation plan，唔一定有師兄師姐提點……連間公司嘅發展都好 “唔一定”!
繼之前有係跨國大企業做 MT 嘅朋友同我地分享完經驗，今次我地邀請左係 Startup 到做「第一屆」MT嘅朋友 (D.Lai) 同我地分享，希望大家對唔同類型嘅MT有更多了解!
（衷心感謝 D.Lai 同我地嘅分享!）
**********************
戴定頭盔先，本文適合對Startup/GoGoVan有濃厚興趣既人，因為我會寫得幾詳細。不過如果心思思純粹想看下自己係咪有興趣，當故仔咁聽，都幾過癮。
當初決定寫e篇野，係因為相信好多人都對GoGoVan e間目前全港融資規模最高既startup充滿興趣同好奇。而我係GoGoVan做左1年多d，由MT做起幾乎掂過香港總部所有部門，之後就去左做Global expansion team既launcher，去到依家既product manager。
望住GoGoVan由係600呎既工廈，高峰期連位都無得坐，去到依家5000呎既HQ office。由中國既開荒牛第一個人開始，看著當時由零，去到依家全中國有幾百人，8個分公司，亦走訪過台灣韓國分部office，看到唔同region既差異性。當然唔少得既就係，見到一間startup係初期，成長期到成熟期，再到高速擴張期會遇到既問題同解決方法。
我希望可以係依度同大家分享依一年幾看到學到既野，亦親身體驗同力證，點解d人成日話係startup度做，個人會成長得特别快。
《簡介下自己背景先》
當年未畢業先創業，係學校宿舍同課室展開創業生涯。回想番，其實當年20歲出頭創業並唔係好hit，講出黎其實身邊無咩人知你係度講緊乜。個人認為係由GoGoVan既成功個案，加埋Google同中大合作既EYE program，先開始普及到e一代既大學生度。
畢業後加入科學園培育計畫，係科學園開始同結束一年半的全職創業生涯。當時未有計劃即刻再創業，所以同各位畢業生一樣，就開始搵工，或者應該係話，認真思考下到底自己想做咩行業。
一直都對傳統公司無興趣，而咁岩當時見到好多GoGoVan融資既新聞，就心唸加入一間有資源有規模既startup學下野，都係唔錯既選擇wo。
由於係同年既HKICT Award ceremony叫做同GoGoVan既founders講過下幾句野，所以決定膽粗粗send個email比佢，看下有無機會interview同加入，又互相了解下。
可能因為當時公司都仲細，最後interview我既係一位高層。當時亦都非常casual，約左係一間starbucks度傾下計，主要都係問我過去一年半創業做過d乜，最後亦順利加入左。
《當年既GoGoVan（2014年9月）》
講番小小當年既情況先，雖然當時全港都係度報導緊GoGoVan成功融資650萬美金e單新聞，但其實當時GoGoVan依然得好少人，唔計founders，計埋客服都係得20人左右。而Office都係係觀塘區工廠大廈，大約600幾呎，忙起上黎連位都無得坐。
老老實實，當年其實無話咩MT “program”咁系統化，唸著都係乜都掂下乜都學下，咁就不如叫住MT先，之後再看表現而決定做咩好。
「核心支柱 客服部門」
一開波，唔洗講咁多，做客服聽電話先。基本上由當年到依家都一樣，最快速可以了解公司既運作就係做客服。
當時每日平均有幾千個司機同客人既電話需要處理，以當時既規模計算，假設有10個客服同時online，平均每人每日每個鐘每分鐘都要“處理”幾多個電話，大家有數得計。亦因為咁密集既訓練，好快你就會熟悉成間公司最核心個part。
去到e度，大家肯定會覺得奇怪，GoGoVan唔係用app call車架咩？明明係間IT公司，點解會有咁多個電話？首先，需要call van既客人咩年紀都有，所以雖然用app落係好方便，但總有一堆人係鐘意打電話黎call車，覺得好似放心d，有人處理緊你既柯打。
我自己就遇到唔少非常趕時間既客，一打黎就話：喂，幫我搵架車去紅磡啊！然後我就已經feel到佢準備收線..我心唸..老細，邊度出發去紅磡先得架？
除左call車電話，仲有打黎問價錢，中小企合作，投訴電話（包括司機投訴客人／客人投訴司機都有，分分鍾一個投訴都要處理幾粒鐘），仲有司機打黎想加盟、查詢d優惠、報告番d有問題既柯打，客人問幾時有車，司機打黎撩下女仔。。無錯，咁就幾千個電話一日。
E個部門雖然係辛苦係好忙，但係GoGoVan入面，客服就把守住口碑同服務質素既第一關，因為佢地係直接面對同處理客人同司機既問題。所以，同其他傳統call台比較，競爭優勢除左係call車速度快之外，就係專業既客服質素。
但從另一方面看，一間IT公司，其實都有佢非常“人手”既一面。如果大家幻想中IT公司係成班“N剪”人，一人揸住一部Macbook Pro係度打code，可能再加幾個人做下online marketing就完左，咁確實係有d出入。因為GoGoVan做緊既係O2O。
MT tips：雖然e part既工作係會比較單一，而且可能負能量會比較多（因為分分鐘會遇到好多客人XYZ你），但係依度打好既基礎，對你之後係邊個部門做都非常有用。
「賺錢部門 Corp team／operations」
當時除左每日都會聽電話之外，都會開始掂下其他野，而另一part同客服最貼近既就係Operations。如果係按對象去分類，客服就係主要處理B2C客人同司機既野，而Operations就負責處理B2B既客人。
好幾間大企業都係我地既合作夥伴，為左保證服務質素，當然係要有專人去服務同跟進，即係好似Account Manager咁。所以你亦可以理解operations 為corporate sales team。
MT tips：e個部門係屬於幫公司搵錢既部門，但如果你本身對物流認識唔深或者無乜興趣，就會難d發揮。
「傳統Call 台」
如果大家當時有看新聞，應該知道當時GoGoVan收購左2間傳統call台。其實表面看都係一個smart move，因為無可能靠APP拿曬成個market，實有堆人係唔鐘意用app。而且人地做左咁多年，實有d經驗係值得去學習。
而作為總部既我地，當然有野就要support佢地，當時我就有幫手負責跟進下e單野。。由印下野，買下機器，幫手整下鎅字跡機，再搞下一個20年幾前既鎅字軟件(當年我都係岩岩出世…..)，又搞下d AI檔又盛，當然唔少得上傳統call台office觀光，同去聽下前輩講歷史。
除左會大開眼界…同唔明點解個運作模式會咁傳統之外..就係深深感受到..GoGoVan既出現並取代傳統call台, 只係遲早既事。
MT tips：有心想打穩基礎，由傳統call台既前輩方面著手就最直接。
「做司機 揸Van仔」
當你d fd問你做緊乜，而你答“我做緊GoGoVan阿依家”，好自然大家就會聯想到，“下？你去左揸Van仔？”。不過今次，我就真係走左去揸Van仔。話說其實GoGoVan有樣野叫流動站，簡單黎講，就係方便我地有野要比司機或者同司機面對面處理問題既一樣“野”。每日都會定時定候係唔同既地方等司機黎，而咁岩個期揸開Van既同事放緊大假，所以我就挺身而出，去左幫手“揸Van仔”。咁其實就係揸一架全藍色既GoGoVan Van仔，搵一個方便停車既地方去meet司機。忙起上黎係可以仲忙過係office聽電話，例如要賣單薄比司機，要找數比司機，要幫司機貼GoGoVan貼紙，要幫司機做驗證（核實司機既資料），要同司機介紹一d最新優惠，當然唔少得既就係聽下司機呻下。。同埋聽下司機既意見。
其實e part係非常有用既一part，因為唔係淨係落order call車先係我地要重視既人，司機都係我地既user，無司機我地亦都唔會服務到d客，如果無司機既意見，當初GoGoVan既founder又點會成功創辦到GoGoVan？
MT tips：司機等於係GoGoVan既supply，如果唔了解司機唸d乜，你又點知自己deliver到d乜比client？可以話比你聽，司機既唸法同你幻想既係好唔同，絕對係超出你預料之外。
「優化內部運作 似係MT要做既野wo？」
見到個topic，終於覺得似係MT要做既野呢？但講明先，當時係GoGoVan既MT，係完全無清晰既path同rotate plan，全部都係unplanned item。
話說當時去揸Van仔之前，成日聽到有幾位同事係office成日”o趙”揸Van仔個位同事，又話佢抄d野抄到亂曬又成日錯又盛，我當時心唸，同事間唔多唔少都有磨鑔架啦，好正常姐。
但後來因為去左幫手揸Van仔，先發現原來成個運作都真係有d問題，當時揸車既同事一個人係出面要處理咁多野，要唔出錯簡直係無可能。
所以我就自發同老細講左我揸左一個星期車既感覺，同埋見到既問題。（當時心唸，我都唔期望會拿到resource去處理依個問題，但基於責任心，都係要將佢講出黎，希望起碼比老細知。）
點知最後老細真係比左個人我，去寫一個簡單既程式，結果就大大減輕左個問題。
但當時最令我自豪，並唔單止係我幫手initiate左e舊野，幫到公司去提升效率，而係我仲叫埋個位係office既同事放工之後一起出車，跟我一起去流動站試下體驗下，而當佢結合左係office同係出面見到既野之後，佢就明白左個問題係邊，同埋點樣更好同揸車位同事合作。
Startup本身就係好細同好close，如果大家都肯行多步，其實好多問題都會自然解決。
當時係好有成功感，因為可以憑自己既力量去影響身邊既人，改變一d野。（依家講番起，依然覺得好年輕，好熱血）
MT tips：所有MT既JD都會話等你了解運作，優化同提升效率。但實際情況係，如果你做到係bonus，做唔到係正常，因為當你想去改一樣野既時候，背後可能係牽涉緊10樣野，影響緊20個人。
「Marketing – 淘雜誌合作」
講左咁多operations既野，都有d有趣d既野既。當時因為office好細，所以基本上全部founders都會成日見，所以都有接觸到負責marketing既個位founder。
當時GoGoVan同淘雜誌有一個合作，係用我地有d特別車身設計既Van仔，比淘雜誌既model做背景，去展示一架傳統既Van仔點樣可以結合fashion。
另外仲有facebook marketing同埋網站既設計等等，都有機會參與到。話說當時GoGoVan咁多人識，全街有咁多架GoGoVan同facebook有幾千個like，但其實個marketing team都係得2-3個人。
MT tips：我唸marketing都算係最好玩既一part，因為公司有資源比你去洗，而且係國際性，有機會可以參與其他國家既marketing。
「代表公司拿獎 – TVB Marketing Award（無錯，做MT係有得代表公司去拿獎）」
如果大家係TVB迷，應該會見過一個GoGoVan既啤啤熊電視廣告。當時因為e個廣告，GoGoVan拿左一個TVB既廣告大獎。
我仲記得有一日，有幾位高層突然行埋黎，話叫我去代表公司拿獎，當時我仲以為佢地講笑，心唸無理由公司咁多人唔叫，叫個加入左公司2個月都未夠既MT去代表拿獎掛？（當然另一方面又好想唔係講笑，因為當時覺得都好似幾型同埋都係拿經驗既好機會。）
結果是真的，佢地話係一個晚宴，要著西裝打煲呔同要上台拿獎，仲有可能要講下得獎感受添。當時其實係覺得幾開心，因為公司比機會你去做代表，唔多唔少都代表係對你個人既一種肯定。
MT tips：屬於六合彩般既偶然率，基本上好難再發生。
「轉捩點 – Global expansion」
講左咁多，再次重申，當年既MT係完全無“Path”的。
以上講既野就大概簡介左我係各個部門掂過既野，雖然只係短短3個月，但見我up左咁多野，就知其實好充實。
當時老細開始問我，黎緊想係邊度幫手？我當時其實都無咩概念，一心只係想搵一個發揮空間大，有挑戰性既position就得。
當時GoGoVan岩岩拿到人人網1000萬美金既融資，需要拓展去中國，而咁岩我既普通話都算係唔錯，所以老細都有問我有無興趣去試下。其實當時我都有猶疑，因為有好多未知之數，而且大家當時對global expansion都唔係好有經驗，話曬GoGoVan個時都係開始擴張。
咁實際去到中國到底係做d乜？傳說中既uber model，點樣可以高速係唔同城市發展？Apply係GoGoVan度又work唔work？成日聽既“開荒牛”，係GoGoVan入面到底係筍野定係做到成隻牛咁？
當時既情況係，無人無司機無客無app無office，基本上你可以想像到要有既野都係無既。
由於實在係太長氣同太多內容可以繼續分享，但又唔肯定大家有無興趣繼續聽落去，所以如果大家feedbacks okay，我就繼續寫埋之後個一年到底係global expansion team同product team係點過啦！
《心得分享》
除左MT經驗，仲想同大家簡單分享我做過founder，然後再去人地公司under返founder做野既心得，同我覺得係startup做野要有既心態。
「無錯 機會係好多 但機會係留比有準備既人」
無錯，Startup的確充滿機會，而且隨時都會出現，問題亦不斷發生等你去解決。但更重要既係，你點樣去準備未知既機會？
頭先講過好多次，係startup係好自動波，而且日日都係度變，無一個既定既計劃。好似GoGoVan咁，可以今日宣佈融資成功，下一秒就需要有新market既開荒牛。
所以，唔好唸著走捷徑，係公司既基礎要打好，再加埋自己看書看article等等既後天努力，去令自己隨時都ready for opportunities。
我見過身邊有同事一黎到GoGoVan，非常心急，一黎就想做大事，基本功唔打好，覺得係dirty work，無value。我自己就非常唔appreciate咁樣既心態。
「入startup其實就好似拍拖咁 對創辦人要有信任 仲需要有一股盲目既熱情」
你將來加入既startup，未必間間都好似GoGoVan咁大規模，而就算係咁大規模，都可能會有失敗既一日。
而一間startup係成長既階段，往往會面對好多挑戰同難關，例如決定公司既市場定位，創辦人之間可能會有意見不一，甚至可能出現公司資金短缺、迷失方向等等既問題。
所以加入一間startup之前，先問下自己，係咪真係咁鐘意依個ideas？自己係咪對創辦人咁有信心，好希望同e間公司一齊成長？
如果唔係，你會遇到1000個理由叫自己離開e間startup。
「無嫌棄 一係你就主動去解決個問題 一係你就 撐！！」
加入左一年幾，有聽過同事會談論創辦人／高層，當然正路都係有讚有彈啦。每個人都可以有自己既看法，可以非常主觀咁表達，亦可以客觀咁去對件事作出評論。
但我係依度想講既係，係startup依個本身已經咁艱苦既環境，我地缺既唔係嫌棄、批評同｀鍵盤戰士｀，我地需要既係無窮無盡既正能量同passion。
見到問題就提出，提高透明度，一齊去解決件事。如果解決唔到，就撐！唔洗講咁多，亦都唔好去影響身邊既人，將自己既負能量擴散出去。
「問公司比到咩你之前 停一停 唸一唸 你又比到d乜野公司？」
大家正常考慮加入一間公司，一定會唸下有咩可以拿到。正如大家爭崩頭入各大公司既MT program，都係因為條path夠清晰，過幾年又有得升manager又盛。
但加入startup，就同uncertainty劃上等號。你唔會清晰知道你會獲得d乜，亦都唔好嘗試浪費時間去估。
反而你應該專注係自己既定位，了解自己可以俾到咩間startup，咁公司自然比到相對既機會你去發揮，到時你自然會攞到你想要既野。
「唔係缺programmer 係缺識解決問題既人」
隨著互聯網興起，成日會聽到IT人才好搶手。但其實IT人才搶手，係因為佢地解決到好多人解決唔到既問題。
而係startup，正正要既就係識trouble shooting既人，因為你身處於最dynamic既行業，每日都有新既資訊、新既知識同新既問題去迎接你。
「放膽去做influencer」
就算係得startup做，都唔一定個個都咁entrepreneurial。
如果你覺得自己係有企業家精神，例如做事充滿熱情、肯take risk、積極樂觀等等，唔該大膽去影響身邊既人，因為好可能你會為成間startup帶黎難以想像既轉變。
「Startup到底係咪要瘋狂OT？」
其實e個問題好簡單，如果你係鐘意間startup，你係想學野想進步，你好自然就會OT（但你同時會好enjoy），因為係startup永遠有好多野缺乏同埋需要improve。
所以你應該問自己，你對自己要求有幾高？你有幾想進步同有幾想加入依場“革命”。
「你要夠flexible 因為Startup係唔同時期係需要唔同既人」
雖然成日話startup透明度高，公司架構平坦。但好似GoGoVan咁，隨著公司發展越來越快，同老細溝通肯定會越來越少，亦都唔一定反映到自己既意見。
e樣野係需要去適應，前期可能你會有好多機會發表意見，可能係公司既中堅份子，但去到公司越黎越大，就要學識team work同服從。
《GoGoVan MT 總結》
－相對易入，但突破難度高，當然回報都較高
－唔洗唸，你當係無clear path，全部靠自己
－全自動波，如果你覺得自己係相對被動既人，唔岩做
－唔好拿Startup既MT同大公司既MT比，無得比，完全2樣野
－Apply之前唸清楚自己想要d乜，正路你唔會對大公司既MT同GoGoVan既MT同時有興趣
－Founder team當然好勁，咁後生間公司可以做到咁大。但founder年輕係事實，如果你expect有好多人去教你點做點做，咁e度應該唔岩你。因為你自學既時間可能多過有人教你既時間。
－少數資源較充足既本土startup，搭沉船機會低
－Office有乒乓球臺，適合乒乓球愛好者
－少數本土startup有international exposure，中國韓國新加坡台灣
D.Lai
支持EJ Tech
如欲投稿、報料，發布新聞稿或採訪通知，按這裏聯絡我們。
