Facebook慘跌有感 (畢老林)
「屠朱大會」十足十社交媒體應用培訓班，fb無端多了一班粉絲。 （路透資料圖片）
7月26日，周四。試想像一下，約了一班好友邊喝香檳邊睇煙花大滙演，結果飲嘅唔係香檳而係梳打水，放煙花變燒炮仗，如此煞風景，你會唔會火都嚟埋，嚷着要主辦單位回水？
標題話明講Facebook，這個比喻為誰而打，不用猜。Facebook業績點睇都唔止係梳打水同炮仗，但上等香檳換了葡萄汽酒，煙花大滙演變作小型煙火會，你收貨嗎？
贏過輸過講經驗
這家社交媒體一哥於周三美股收市後公布次季業績，營業額、每股盈利、廣告收入等「大數」瓣瓣錄得雙位數增長，仲要係按年三四十個巴仙嗰隻，但業績一出，Facebook股價after-hours瀉逾兩成，最低見過165美元。投資者就好似老畢同上面班豬朋狗友那樣，預咗睇最精采嘅Show，飲最靚嘅酒，稍為低於預期就當貨不對辦論，盤數見得人都係咁話。
齋講業績，睇新聞好過。Facebook周四於美股正規交易時段到底可以彈番多少抑或衰多兩錢，會不會拖累其他FANG股以至大市，很快就會知道。老畢覺得，講新聞不如講經驗，尤其是贏過輸過的經驗。
目睹Facebook after-hours跌得咁慘，那個165美元成交價令在下「百感交集」。大家想必記得，三四個月前，Facebook因劍橋分析（Cambridge Analytica）事件搞到一身蟻，私隱風波逼得創辦人朱克伯格（Mark Zuckerberg）着晒老西打晒呔，死狗咁款上國會山莊接受兩黨議員質詢。
科網巨頭priced for perfection，一有風吹草動或業績交唔到數，股價就會出現Facebook眼前的慘況。（路透資料圖片）
瞌埋眼buy the dip
經過該役之後，老畢發現critical thinking往往敵不過「群眾力量」。你花好多時間睇好多嘢，用大量理據質疑Facebook的商業模式在新環境下work定唔work，但仲未有時間證明自己啱唔啱，就有一大棚人湧入市場趁低吸納。結果你出人哋入，嘜正個底做咗「燈」。
今次會唔會歷史重演？經驗話畀我聽，難估嘅唔係Facebook用戶增長是否飽和、attention是否已見頂、經歷私隱醜聞後利用客戶數據賺錢空間仲有幾大，而係股民會唔會好似上次一樣，見Facebook股價大跌就瞌埋眼buy the dip。
呢樣嘢很難猜。科網巨頭priced for perfection，一有風吹草動或業績交唔到數，股價就會出現Facebook眼前的慘況，早前Netflix亦面對類似情境。問題是，priced for perfection之於科網龍頭，就如同以市民負擔能力跟樓價脫節睇淡香港磚頭一樣，今時今日言之成理，四五年前一樣講得通。
費盡心機發掘「價值股」， 這幾年回報拍馬追唔上乜都唔理死揸幾隻FANG股。此輩的「信念」，一兩份讓市場失望的業績報告未必便能動搖。
更多畢老林文章：
支持EJ Tech
如欲投稿、報料，發布新聞稿或採訪通知，按這裏聯絡我們。
 - EJ Tech){kind=link}
){kind=link}