許飈初心 共享工作間變協作社區 theDesk助會員互動 增區內企業交流
由來「物以類聚，人以群分」，像共享工作間品牌theDesk聯合創辦人許飈（Thomas），早年任職銀行、企業首席財務官，亦曾開設管理顧問公司，過程中最享受的並非賺錢，而是跟不同企業家交流、協助他們解決問題。到如今自己成為一分子，依然不忘初心，貫徹孔子的「三人行，必有我師」信念，致力跳出傳統共享工作間框架，為會員構建真正的協作型社區。
Thomas的生意頭腦於中學時代已展現，「第一單成功做成嘅『生意』，係貪得意用廢物整咗件玩具，5蚊賣咗畀個朋友，滿足感好大。同埋細個已經幫屋企做家庭工搵錢，過程中解決問題、或者完成一件事嘅感覺好好，所以早就感覺到自己唔適合喺大公司打工，乜都鍾意問點解，但大公司好多嘢無得解。」
Thomas直言，打工仔在家工作並不可行，「人始終係social animal（社交動物），長期留喺屋企會引致情緒問題，共享工作間市場仲有好大發展。」（黃俊耀攝）
銀行打工 開拓做生意視野
天生好奇愛發問的性格，當時未令Thomas立志將來成為企業家，惟形成對生意經的興趣。他在中文大學碩士畢業後投身商業銀行，為的正是跟企業家客戶交流，「做銀行其實幾闊，見識多啲，同埋我哋啲客都係老闆，可以有個咁嘅氛圍，認識唔同嘅生意。」
原來一開始，他已心知不會長做銀行，故5年後離開，不過中間牽涉一段唏噓往事，「我1999年走，你知嗰期亞洲金融風暴，我做緊間銀行正在裁員，裁走另一位同事，無幾耐我就自己選擇離開，所以其實幾內疚。如果我早少少走，佢可能唔使畀人裁，佢喺1997年樓市最高峰買咗樓，可想而知幾慘。」
這個世界無如果，後來Thomas轉職中小企擔任首席財務官，協助行政總裁。問當時是否為創業鋪路？Thomas笑言當年沒想得那麼遠，「純粹鍾意諗做生意嘅嘢，咁愈接近啲CEO、企業家，自然成日有機會聽呢啲故仔、參與討論，發表個人意見，係興趣嚟。」
然而做CFO面對的只是本身公司CEO或其他銀行家，「圈子幾單一，無乜人脈關係」，對想「海納百川」的Thomas來說當然不夠，「正因為成日幫CEO一齊解決問題，發現好多中小企面對嘅困難，其實我有能力去幫手解決。」於是他2009年自立門戶，成立管理顧問公司，「幫一個人（CEO）已經唔夠滿足我嘅好奇心，想幫多啲唔同嘅人。」
「當時覺得好玩就做（管理顧問），無諗過點樣令盤生意成功；我又唔係大品牌，啲客畀得錢你提供服務，就真係想你幫佢，而唔係叫你整份報告等佢敷衍個board（董事局）。幫每個客做幾個月，佢哋將幾十年喺行業嘅認知好坦白咁話畀你聽，佢對banker（銀行家）只會講好嘢，但對consultant（顧問），如果真係期望你幫手解決問題，所有真話都會同你講。」看得通透的Thomas娓娓道來。
Thomas早就感覺到自己唔適合喺大公司打工，乜都鍾意問點解，但大公司好多嘢無得解。（黃俊耀攝）
獲希慎認同 銅鑼灣擴據點
由打工到如今經營theDesk，愛與生意人交流、助解決問題的初心不變，「並非淨係space（空間）嘅sharing（共享），而係一班唔同背景、唔同行業嘅人，平時可以走埋一齊互相支持同啟發，喺個casual（隨意）、唔係好有特定目的嘅環境，自然咁建立人脈關係。」
本港很多共享工作間只為會員建立社區，theDesk有所不同，着眼點不單是空間內互動，而是進一步延伸至支援左鄰右里，「我哋有專門嘅community team（社區團隊），每進駐新據點都會派同事『洗樓』，跟同一區嘅企業交流。」
正是這inclusive community（包容性社區）概念，讓theDesk首個據點於2016年落戶西環後，翌年即獲銅鑼灣大業主希慎（00014）邀約，先後到集團旗下區內物業開設兩個據點。
Thomas提到，希慎相當認同包容性社區理念，此舉既為會員提供多元化資訊及合作方案，例子之一是若會員需要會計服務，theDesk可推薦附近會計師樓幫手，省卻尋找時間，對方又多了個搵生意門路；也有不少鄰居會租場辦活動，「呢啲event收入佔我哋整體生意額約20%」。對大業主來說，整幢大廈關係好，租客互相介紹生意，續租機會相應增加，可說共贏。
現時theDesk在全港有8個據點，分布西環、上環、金鐘、銅鑼灣、紅磡、沙田等。會員背景多元化，50%外籍人士，大部分屬初創，也不乏大企業。
由打工到創辦theDesk，許飈愛與生意人交流、助解決問題的初心不變。（黃俊耀攝）
加快進駐全港 殺入住宅區
至於新冠疫情對共享工作空間發展有否影響？他指出：「疫情令remote work（遠程工作）趨勢加快，唔少公司考慮將中央辦公室收細，轉晒做open plan（開放式），員工（每周）兩日返工、3日work from home……之前有個CFO調查發現，超過70%企業決策者都打算將remote work變成permanent policy（永久政策）。」
可是Thomas對此另有看法，直言香港居住環境狹窄，打工仔在家工作並不可行，「人始終係social animal（社交動物），長期留喺屋企會引致情緒問題，共享工作間市場仲有好大發展。」
他又透露，公司未來策略是做到全港18區遍地開花，「以前你想像唔到傳統住宅區都有呢啲需求，好似我哋舊年喺（紅磡）嘉里酒店開（據點），90%會員住黃埔，全部唔想喺屋企做嘢；同埋會員可以自由出入我哋任何據點，變相成件事靈活好多，所以我哋要加快步伐喺唔同地區開，capture（奪取）呢個市場。」
做生意，尤其初創，最難是建立商業上人脈關係，有共享新理念「作媒」，創業之路可能順遂一點。
採訪、撰文：許鎮邦
攝影：黃俊耀、受訪者提供
其他「周一人物」文章：
支持EJ Tech
如欲投稿、報料，發布新聞稿或採訪通知，按這裏聯絡我們。
