新冠疫情肆虐超過兩年，實體活動多番叫停或索性不辦，令營銷及策劃行業生意一落千丈，與其坐以待斃，不少人靈活變通，例如內容營銷及活動策劃公司FEEDHK創辦人袁振雄（Kim），爆疫初期果斷開拓B2C（企業對客戶）網上活動策劃業務，過程中雖有起跌，依然堅持「唔好理，試咗先」信念，今年更勇闖元宇宙及NFT（非同質化代幣）領域；窮則變、變則通，捱過風雨，總會迎來彩虹。
Kim父母都經營實業，他大學時已參加初創比賽，但有感經驗不足，故畢業後先投身職場，在英文的時尚生活月刊從事廣告銷售，一做5年多，笑言最大覺悟是：「唔好得罪media（傳媒），一來支筆喺對方度，同埋做嗰行識到好多人，個個都將第一手資料話畀佢哋知。」
Kim任職雜誌後期，發現品牌開始減少投放廣告，又或要求附送一次活動，有感傳統媒體愈趨難做，遂轉戰活動策劃行業，「下一份工喺內地做最大嘅遊艇lifestyle show（時尚生活節目），學識點由0到100去成為一個活動策劃者，嗰陣我哋一年只做呢個event（項目），已經夠公司『維皮』。一個咁大規模嘅event，我哋都係得4、5個人，所以乜都要學。」
FEEDHK創辦人袁振雄一直堅持信念，即使策劃活動期間屢遇挑戰，最終也迎來彩虹。（黃勁璋攝）
辦美食車嘉年華一炮而紅
2016年4月迎來新挑戰，本港美食車計劃接受申請，「當時我有個朋友喺美國返嚟，見到food truck（美食車）話題咁hit，提議我喺香港搞吓相關event。」凡事愛「試咗先」的Kim，遂坐言起行創立FEEDHK，膽粗粗向PMQ（中環元創方）遞交計劃書，再物色贊助商，翌月在元創方舉辦一連4日的首屆香港美食車嘉年華。
談到該次活動，原來也曾遇麻煩，「大家都未知美食車個牌照點出，食環署日日派人來查，話唔可以喺架車上賣食物，政府其實亦無話唔畀，存在灰色地帶，我話消防批咗個牌畀我喎，即係證明得啦，不如你哋部門之間傾好咗先。」
小小阻滯未有影響活動成效，更打破元創方之前的人流紀錄，令Kim「一炮而紅」，此後生意源源不絕，並開拓內容營銷等範疇，「我好鍾意無嘢搵嘢嚟搞（笑），有時覺得個event正喎，試吓做，搵夠sponsor（贊助商）就開得波，唔賺錢咪唔賺囉！起碼做咗樣自己鍾意嘅嘢。」
2019年底，本港爆發社會運動，接着新冠疫情來襲，活動策劃這行業大受衝擊，「個市非常差，身邊好多朋友仔（辭職）走晒出嚟，乜行業都有，有啲想創業，有啲想做freelance（自由職業），問我有無job（工作）彈畀佢哋。」Kim靈機一觸，決定廣納這班賢才，推出創意服務平台PROJECT 108，寓意中國章回小說《水滸傳》中「梁山泊108位好漢」。
「呢班人其實個個『身懷絕技』，只係唔識sell（營銷）啫，就由我牽頭幫大家搵錢，呢套模式到而家幫助公司增加咗至少30%營業額；對客戶嚟講，啲（event）agency（活動策劃公司）通常聲稱乜都識做，好多時係搵vendor（外判商），而家我哋將呢樣嘢透明化，啲客會覺得舒服好多。」Kim解釋。
構思雖好，可是面對疫情，人算不如天算，「真係無晒event，2020年中，好差嘅時候，連拍檔都話不如（放棄）算啦，搞唔掂。」然而Kim堅持「命運是對手永不低頭」，「offline（線下）唔得咪試做online（線上），嗰陣市場已經有B2B（企業對企業）嘅online event，我就諗點解好似無乜B2C？」
Mart in Metaverse於2022年新年「誕生」，成香港首個元宇宙活動。（受訪者提供圖片）
行業先鋒 獲旅發局邀合作
在時尚生活圈累積多年人脈的他，策劃的首批B2C線上活動，也跟吃喝玩樂元素有關，如咖啡推廣、夜場遙距表演等，「好坦白，呢啲活動我視為投資，全部輸到趴街，因為香港人嗰個moment（時刻）未接受到（B2C線上活動），我都係邊做邊學，輸就輸啦，起碼贏到noise（迴響）同經驗。」
有志者事竟成，2020年後期，旅發局擬把該屆「香港美酒佳餚巡禮」改以「線上＋線下」形式舉行，「B2C嘅市場無人做，佢哋（旅發局）話得我做過咋喎，之後（生意）就開始嚟，個個都話轉線上，都要B2C，我哋2020年下半年（生意）翻盤，跟住去年直情好好。」
正當Kim打算今年乘勝追擊，並已跟旅發局商議好，農曆新年在中環海濱舉辦大型年宵市集，不料1月份突殺出第五波疫情，一盆冷水照頭淋，「又嚟？簽晒（合約）做唔到喎，我向同事講，未來（疫情）睇嚟有排搞，橫掂Metaverse（元宇宙）係咪都要行，不如做個元宇宙年宵。」
創立MMMeta 勇於新嘗試
當時距離農曆新年只有兩星期，Kim這大膽想法自然換來團隊成員「個個說我太狂」反應，他再次發揮「唔好理，試咗先」本色，由構思內容、搜集資料，宣傳到舉行，「嗰兩個禮拜啲同事真係不眠不休，晚晚做到4、5點」，最終將不可能變成可能，「MART IN METAVERSE元宇宙年宵」在虛擬平台成功舉行，9天共吸引逾5.2萬人次「入場」，甚獲好評。
該次經驗令Kim信心大增，今年3月創辦元宇宙內容營銷公司MMMeta，進軍新領域；雖然元宇宙究竟會為人類帶來什麼，至今仍是未知數，一向堅持的Kim繼續其「前行步步懷自信，風吹雨打不退讓」態度，「喺我角度都係嗰句『唔好諗，行啦』，你要親身試過行過做過，先知道發生咩事。」
記得曾有一首鐘錶廣告歌，其中兩句是「永遠向前，永不停步……」，嘗試是挑戰，成功與否總也有得着，若畏首畏尾原地踏步，難免被時代淘汰。
採訪、撰文：許鎮邦
攝影：黃勁璋、受訪者提供
