港產物流服務平台GOGOX（前稱GoGoVan），2013年由5位本地年輕人以2萬元資金創立，他們大概意想不到，打拚數年，公司已成為本港物流業龍頭之一，更躋身獨角獸行列，且最近遞交了上市申請；兼任聯席行政總裁的其中一位創辦人林凱源（Steven）認為，不怕嘗試、靈活應變，是初創成功要素。他日前接受本報專訪，分享創業難忘點滴，以及這門生意背後理念。
出身基層家庭的Steven，父親是裝修工人，自小告誡他要努力讀書，否則將來只能從事體力勞動工作，然而父親的苦口婆心，未能改變他無心向學的事實，反而喜歡幫朋友組裝電腦賺零用錢，頗有生意天份，最終他經歷兩次會考，獲恒生商學書院（現為恒生大學）取錄，「入到去仲畀校長捉我考多次會考，前後3次，應該無乜人多過我。」
19歲那年，Steven已移民美國洛杉磯的大伯，請他們一家到當地旅行，小伙子驚嘆世界之大，感受到讀萬卷書不如行萬里路，遂萌生出國留學念頭，無奈家中環境無力負擔，此時大伯跟Steven父親說了一番話，「佢話當年所有去美國嘅留學生都係無錢，如果唔係（三藩市）點會叫舊金山，啲人就係去掘金，而家呢代先話有錢先去留學，阿爸覺得又有道理喎。」
林凱源認為，經營初創要本着grow or die精神，一定要努力成長，否則就會死亡。（黃潤根攝）
美國留學半工讀 洗車售iPhone
結果Steven拿着父親購買的1張單程機票和200美元，在2005年展開飄洋過海旅程，入讀美國社區學院；抱着破釜沉舟決心的他，其後考入加州柏克萊大學哈斯商學院讀工商管理，為賺取學費及生活開支，在中餐館兼職半工讀，期間認識同樣來自香港的鄧權威（Nick）及關俊文（Reeve），他鄉遇故知，很快結為好友。
「之後大家成日搵啲『騎呢』生意去做：網上買賣舊車舊單車，又試過喺學校停車場賣熱狗、喺街邊豎塊牌幫人洗車；其實都係環境迫成，要不斷諗計賺錢繼續學業。」2010年Steven大學畢業，成績名列畢業生前5%，惟時值全球金融海嘯後不久，美國經濟元氣未恢復，工作機會不多，於是回港發展。
至於GOGOX的誕生，又是另一個故事：話說2007年於美國求學年代，三人已在網上賣首代iPhone，賺到第一桶金，成功應付彼邦學費，那次經驗令Steven信心大增，既然人在異地都能靠自己完成學業，回到熟悉的香港，更無理由不成，「美國生活成本咁高都維到生，香港住又住屋企，賺到足夠使費就得，咁不如搵啲小生意做下，唔使靠人（打工）。」
Steven第一次到美國旅行後，驚嘆世界之大，萌生出國留學念頭。（被訪者提供）
合資2萬創業 變港產獨角獸
Steven遂把想法與兩位拍檔分享，一說即合，開設飯盒廣告公司，「個idea點嚟？當年我哋喺（美國）中餐館送外賣，成日包外賣盒，一送就送到夜晚11、12點，成車食物但自己個肚好餓；美國中餐啲飯盒會寫住Have a nice day，忙起上嚟飯都無得食，望住成車Have a nice day（外賣盒），係幾諷刺。」
「我哋要放Fortune Cookie（幸運曲奇）入個盒，我哋嗰啲特別平，唔係獨立包裝，成日自己爛開，入面張紙跌咗出嚟，你知嗰啲紙條都係寫住啲『永恒真理』，Reeve就提議不如直接（將文字內容）印喺個盒度，寫下啲fun fact（有趣事實），嗰陣大家都覺得個idea好正，不過最終講完就算，無實行。」Steven娓娓道來。
直到三人回港後打算一齊創業，舊事重提，「香港無Fortune Cookie，我哋就諗不如搵人（在飯盒）落廣告，好似免費報紙咁，收廣告商錢。」結果公司成立大半年已收支平衡，可是遇上另一難題，由於要趕在各餐廳開門前將飯盒送達，隨着訂單增加，運輸需求大增，「試過最高紀錄一日送10萬盒，個logistics（物流）七國咁亂，有時打咗成日電話，都搵唔到司機送貨。」
林凱源（中）與拍檔開發的物流App，改變本港運輸業生態。（被訪者提供）
當年香港貨運業營運模式仍相當傳統，司機多屬自僱，透過電召平台接單，每月要交付數千港元，惟平台不會按司機位置和路線安排訂單，效率極低；Steven等人與很多貨車司機談過，明白他們對電召模式的不滿，於是決定做一款手機應用程式（App），幫助司機和乘客更有效率溝通，「其實一開頭無諗到改變成個行業，只係想解決當刻我哋公司個物流問題」。
未幾，Steven找來兩名昔日的中學同窗加入，5人共合資2萬元實現創業夢；GoGoVan應用程式於2013年7月正式上線，結果平地一聲雷，翌年進軍新加坡和台灣，2015年以「快狗」為名登陸內地市場，除商業快遞，還提供搬屋和寵物運送；2017年8月與中國貨運平台「58速運」合併，公司估值突破10億美元（約78億港元），成為港產獨角獸初創之一，並吸引阿里巴巴與騰訊系入股。
林凱源近年經常在不同場合分享創業經歷。（被訪者提供）
堅持五大經營理念 傳遞快樂
時至今日，GOGOX堅持的是五大企業理念，「第一係dare to venture，即勇於嘗試；第二係no bullshit，講咗就做；第三係top of your game，一係唔做，一做要做到最好；第四係grow or die，一定要努力成長，否則就會死亡。」
「呢4樣嘢最終目的就係deliver happiness（傳遞快樂）。你送支水由A點到B點，好多公司都做到，但要令到個過程，無論送件人、收件人、司機……（持份者）個個都稱心滿意，用家體驗係好，就唔係咁簡單，呢個先係我哋終極目標（第五理念）。」Steven新冠疫情下，物流生意可謂一枝獨秀，然而商場如戰場，怎樣「埋身肉搏」超越對手，保持卓越，方為發展之道。
採訪、撰文：許鎮邦 攝影：黃潤根、被訪者提供
