孔浩榮藉微營養學成就健康大業 人體測量學博士長居歐洲 回港創業尋根

原文刊於信報財經新聞「周一人物」

人類近年愈趨重視飲食健康，有關營養學的研究領域愈分愈細。提供健康方案的Symbionat（新柏力）聯合創始人孔浩榮（Samuel），本身是人體測量及微觀營養學專家，私底下為巴西柔術高手；以往長居歐洲的他，3年前帶着「微營養」（Micronutrients）這新概念來港創業，目標是建立一個滙聚健康產業持份者的平台，發揮協同效應，「人體數據、微營養同柔術都講求unity（一致），呢個亦係我嘅商業哲學。」

雖擁有港人身份，然而Samuel人生上半場從未正式在港定居。他出生於法國，高中畢業後到瑞士升學，在洛桑聯邦理工學院（École Polytechnique Fédérale de Lausanne）取得人體測量學博士學位。何以選擇如此冷門學科？「其實幾有趣，好似你坐緊張凳，都要跟番人類身體structure（結構），咁就可以develop（發展）到個layer（層次），用嚟generate（產生）啲嘢出來：屋、衫……都係跟番同一套理論。」聽來跟日常生活息息相關。

嘆港人工時長 運動睡眠不足

完成學業後他留在瑞士，初期於大學從事研究，開始接觸微營養學範疇，即研究人體微觀世界，例如細胞、人體微生物、基因、荷爾蒙、神經元、神經遞質等的營養，對人體微觀生態進行維護。

在瑞士一住20年，Samuel積極與全球微營養頂尖專家組共同研究及工作，至2018年決定回港發展，一為尋根，二來覺得香港雖屬大城市，惟市民健康狀況欠理想，「健康睇四樣嘢：飲食、運動量、睡眠質素、壓力；你知香港人食嘢選擇多，但好多時都係求其就算，兼且食無定時，平時運動唔夠，坐office坐得耐，工時長，壓力大，少見陽光，瞓覺瞓得唔好，好多人一晚只瞓4、5個鐘。」

只看卡路里難顧及整體狀況

信口說來已一堆問題，難怪他不諱言，與瑞士相比，香港生活環境差天共地，「（瑞士）節奏、空氣、食物……乜都健康啲，所以我好想帶呢個（微營養）concept嚟香港，希望幫到多啲人；（微營養）係holistic（整體）去睇個身體狀況，並非頭痛醫頭；同埋要睇功能性，平時我哋講營養係講卡路里，主要計能量，睇唔到細胞嘅功能。」

Samuel進一步解釋，從宏觀角度看，營養學留意的是蛋白質、脂肪、碳水化合物等，若要分析細胞功能，就須關注免疫反應、基因反應，這方面依靠微營養學如維他命、礦物質、多酚、益生菌等，「你要知道邊啲嘢有乜功效，先發揮到最大作用同埋協同效應。」

聽來如斯複雜，如何讓港人理解？「雖然難，（香港）都有個好處，事關港人相當認識中醫（學），幾千年歷史都係用食物處理身體健康，反而西方近呢幾十年先用新嘅科學approach（方法）去發展，不過亦因為咁，日日有新發現，所以我哋更要與時並進。」

Samuel說：「最難不在於要香港人接受呢個（微營養）概念，反而係solution（解決方案）方面；我成日同拍檔傾，港人可能慣咗畀人manage（管理），往往要求一啲即食嘅solution：『我畀咁多錢你，你要畀個即食方案我，等我唔使煩唔使諗。』，西方唔同，畀啲guideline（指引）佢跟就得，唔使我哋日日mon住（monitor，監控）：『喂你今日食咗啲乜？有冇食呢樣嗰樣？』，香港人可能慣咗呢種方式。」

不論讀人體測量、研究微營養抑或打巴西柔術，他認為最大共通點都是unity，可是現今社會愛將事物化整為零，「愈讀得書多，愈鍾意將啲嘢分到好細去分析，你睇一個橙，原來只睇佢維他命C高唔高，咁我就做一個好高維他命C嘅橙賣畀你，但到最後你食普通一個天然橙，可能仲有益過食『維他命C橙』；你只食一樣嘢，幾有益都好，始終唔夠天然。」

建平台滙集專才 顯協同效應

對飲食態度如此，Samuel事業哲學也一樣，他深明單憑一己之力，無法為世界帶來重大改變，故現時除專注公司自身發展外，亦致力以科技賦能健康產業，並培養專業人才，「目標係建立一個平台，等wellness（健康產業）世界嘅持份者可以聚埋一齊，發揮協同效應。呢個市場潛力非常大，無邊無際，一間公司無可能做得晒，要多啲人一齊分享，先可以將個產業做大做強。」

民以食為天，怎樣才算食得健康？宏觀上很多人都明白要少油、少鹽、少糖，購買預早包裝食物時留意成份。其實這還不夠，人人體質不同，若從微觀角度出發，食得精準，才能食出健康。

採訪、撰文：許鎮邦 攝影：黃勁璋、受訪者提供

其他「周一人物」文章：

• 棄從醫搞科研 攻幹細胞心臟技術 Medera李登偉要造福千萬人
• 17LIVE香港舵手 撫慰都市寂寞心 周榮春投身直播 娛己娛人大商機
• 「小黃鴨之父」林亮 為玩具添生命力 90歲再創業 重塑經典宣揚奮鬥精神

支持EJ Tech

如欲投稿、報料，發布新聞稿或採訪通知，按這裏聯絡我們。