邵氏基金會主席陳偉文傳承善心 推動教育科研醫療藝術 秉持捐得其所
已故影視大亨邵逸夫是國際知名的大慈善家，生前在夫人邵方逸華（已歿）全力協助下，先後成立邵氏基金會、邵逸夫慈善信託基金，及邵逸夫獎基金會等，致力發展教育科研，推廣醫療福利和推動文化藝術。善心當然要靠有心人傳承，邵氏基金會主席陳偉文（Raymond）正是這位有心有力賢能；加入邵氏28年的他日前接受本報專訪，分享基金會理念和未來大計，以及多年來與邵氏伉儷相處的難忘回憶。
Raymond在港土生土長，中學就讀鄧鏡波工業學校，後負笈英國進修建築，原來是受父親熏陶，「爸爸好鍾意樓宇相關嘅嘢，經常帶我哋去睇樓，一直好想我向（建築）呢行發展。」他不負期望，成為建築師，回港後在一家建築師事務所工作，因參與邵氏旗下銅鑼灣翡翠明珠戲院改建而與邵逸夫夫婦（六叔六嬸）結緣，亦改變了原本的職業規劃。
上世紀九十年代初，邵氏有意在深圳興建一個類似環球片場的項目，力邀Raymond過檔幫手，「我本身都熱愛影視文化，有個同電影有關嘅主題公園，梗係想參與。」遂於1994年1月正式加盟，並多次前往全球各地的相關主題公園研究考察，更連設計圖都草擬好。
參與多項改建 寶聲戲院最棘手
可惜世事往往人算不如天算，正當萬事俱備，香港宣布建迪士尼樂園，「老闆（六叔）話唔想有直接競爭，叫停咗個（深圳主題公園）項目，（覺得可惜？）少少，不過嗰陣（時機）可能未係咁成熟。」其後Raymond改為負責把公司旗下大型戲院轉型為迷你戲院加商場，以及舊清水灣片場改建為辦公大樓等項目。
「轉型改建」只有4個字，難度卻絕不簡單，「呢啲物業往往牽涉住宅加商業，結構頗為複雜，要改建裏面個『內餡』，有時落樁，樁頂嗰啲又落唔到下低地舖，就係挑戰。」被問到最困難是哪個？他不假思索：「（觀塘）寶聲戲院！因為天台唔屬於我哋業權，地下又大部分唔係我哋嘅，所以喺中間要再間啲樓層，結構真係非常複雜。」
至於標誌性項目邵氏影城，公司早於1999年已投標首塊地皮，2004年在將軍澳落成啟用，佔地100萬方呎；Raymond透露，初時跟多間電影公司合作，原意讓大家各自使用影城進行拍攝，惜後來本地電影市道漸走下坡，其他股東相繼退場，邵氏先後收購對方股份，而影城發展步伐並無停止，包括興建全球其中一個最大的杜比全景聲混音影院，除港產片外，不少荷里活大片也曾在影城借場搭景。
惟新冠疫潮持續兩年多，影城出租率難免受影響；被問到會否考慮開設導賞團？Raymond不諱言很難：「事關有衝突，（電影公司）攞啲項目入嚟，私隱度要好高，你帶啲導賞團去，有可能侵犯到人哋知識產權，但我哋都希望將來（影城）有個展覽地方，嚟緊會着手做，不過只接受預先邀約嘅團體（參觀），唔可能打開門任人自由出入。」
邵氏影城一直在邵氏基金會支持下營運，基金會以推動文化藝術傳承為宗旨，2017年六嬸離世後，Raymond接任主席，帶領基金會繼續與香港、內地及國際機構緊密合作，捐助醫療、教育、藝術三大範疇的大型項目，「當然時代唔同咗，有啲着重嘅方向亦都改變咗，所以我哋20年前開始設立『邵逸夫獎』，因為科研係一個好重要範疇，希望透過呢個獎啟發年輕人向科研方面發展。」
如今邵逸夫獎在全世界享負盛名，若時光倒流20年，其實經歷過一段「萬事起頭難」階段，「我哋好彩得到（著名物理學家）楊振寧鼎力相助，好快建立名聲，以及我哋揀選嘅科目（天文學獎、生命科學與醫學獎、數學科學獎），盡量避免同諾貝爾獎競爭，評審亦好嚴謹，得獎者無乜爭議性，所以好快就有個公信力；而家好多諾貝爾得獎者，都係先攞咗邵逸夫獎，我哋算係佢哋（諾貝爾獎）嘅『明燈』。」
可惜的是受疫情影響，近3屆的邵逸夫獎頒獎典禮只能移師網上直播（2022年的一屆剛於9月29日網上舉行），Raymond承認略感遜色，「實體頒獎典禮令到外國得獎者嚟到認識香港，維繫性強好多，希望出年開返關，佢哋可以再返嚟。」
冀邀同路人合辦創科中學
現時邵氏的收入主要來自投資，租金收益全用作慈善用途；不要以為做慈善只是捐錢，Raymond說捐容易但要捐得其所，達成心目中理想成果，無論構想、執行方面均花上大量精神與心力。
至於基金會未來發展方向，主要有兩大部分，「第一係以教育為主，我哋會偏重於創科教育，你知而家STEM、STEAM都係好流行嘅話題。」STEM是科學（Science）、技術（Technology）、工程（Engineering）及數學（Mathematics）的縮寫；STEAM則是跨科學教學方法，多了藝術（Art）一項。
他又認為，STEAM教育應普及到中學生，最理想是本地可以有「創科中學」，專門從事STEAM教育，故基金會最近向政府申請，將邵氏一幅位於清水灣的地皮捐出，由基金會負責建築費，惟因所涉及的捐款資金相當龐大，會方或獨力難支，期望可邀請其他志同道合基金或慈善團體共襄善舉。
文化傳承是另一重點發展方向，「既然我哋有咗（邵氏）影城呢個平台，希望可以將香港嘅流行文化、過去嘅成就、往後嘅定位願景，繼續傳承落去，教育下一代。反而製作方面比較少，因為我哋轉咗做慈善基金之後，投資營運有一定規條，所以唔會好似以前咁大量做製作，但是對於有意義嘅項目，我哋依然會考慮。」
建築師出身 統籌執行有道
由建築師到成為基金會主席，崗位大不同，然而Raymond覺得建築背景和經驗能大派用場，「建築師喺個建築團隊入面係leader（領袖），會訓練到你點樣組織件事，執行上確保做得好，呢方面絕對有幫助。」
「邵氏出品，必屬精片」這句經典電影口號大家耳熟能詳，如今邵氏將重心轉移至慈善，同樣秉持這份信念。問到身負接班重任的Raymond可會感到壓力？「當然你話捐咗錢就算，成件事可以好輕鬆，你想件事成功，無形中自然有壓力，佢哋建立咗咁好嘅legacy（遺贈），我哋就算做唔到好大進步，亦起碼唔好向後退。」
採訪、撰文：許鎮邦 攝影：何澤、受訪者提供
更多「周一人物」文章：
支持EJ Tech
如欲投稿、報料，發布新聞稿或採訪通知，按這裏聯絡我們。
